Oh Dìo! che caldo, no se puol magnar,
Nè se trova riposo in gnessun liogo,
Se se descola, come, che fà un Cuogo,
Quando, che ’l gà da far qualche disnar.

No se puol star in pie, nè caminar,
No se puol divertirse a gnessun ziogo;
L’Inverno almanco se se cazza al fuogo,
Co se vuol al gran freddo remediar.

La robba, o che l’è dura, o l’è passada;
I pulesi ve magna, e anca i mossoni,
E i so interessi và alla buzarada;

E chi volesse far dei pettoloni
Le Donne le la gà tutta suada,
E i Omeni gà ’l Cazzo in ti cogioni.